戒烟大赛将会对市民有很大的启发 http://www.zgbdf.net/baidianfengjiankangzixun/kuaixun/m/28336.html

作者：沈嘉禄沪语改写：周红缨文字修正：丁迪蒙诵读：孙蕾

包粽子是勿灭个上海弄堂风情。现在，上海个弄堂房子越来越少了，阿婆姆妈拉围勒海坐勒一道包粽子个情景也是难板看见了。但是我想，迭个场景永远会得留勒上海人个记忆深处。包粽子，是阿拉搿代人个童年印象，每年端午节到快个辰光，空气当中就好像弥漫起粽箬搭仔糯米混合加热以后散发个香气，伊个辰光，弄堂里向包粽子个各种细节，也会得一记头涌到眼门前。

埃个辰光，弄堂人家包粽子，侪要分送拨勒左邻右舍个，所以一包起码要几十只。当然，明后天也会得收到邻居送得来个粽子，礼尚往来，其乐融融。邻里关系就勒搿粽子飘香个季节里得到了增益。我姆妈用勿同颜色个线来包肉粽，红个是分拨邻居个，里向个肉大，自家吃个肉就小眼。交关风味，之所以勒阿拉品尝伊个辰光会得突然激起感情个涟漪，其实就是通过食物个媒介、想到了已经离开了个亲人。我小辰光老欢喜看大人做手工生活个，包粽子也是一定要看个节目。趁大人勿注意个辰光，就偷几张粽箬，拿伊卷成功一只哨子，一边走一边吹，声音清脆、尖锐，假使有得几个人一道吹，就老好白相个。假使做成功大个，声音邪气响，传得更加远了，就有小英雄吹海螺号个豪气了。我姆妈是包粽子个能手，枕头粽、三角粽、小脚粽侪难勿倒伊，再狭个粽箬伊也好拼起来用。嘴巴里咬牢线个一头，另外一头拿粽子捆得石骨挺硬，迭能介煠就勿会得散脱，吃起来有咬劲。姆妈还会得搭我包几只袖珍粽子，串成功一串，烧熟以后拨我白相。

后首来，我也学会包三角粽搭枕头粽，手痒个辰光也会得轧轧闹猛，但是小脚粽一直没学会。小脚粽是因为形状像老底子女人个小脚而得名，勿用绳子个，侪靠粽箬穿插，拿只粽子包裹周全，充分体现了妇女个智慧。包小脚粽个大多数是苏北女人。小脚粽包个大多数是赤豆搭白米，优点是比三角粽更加紧实，吃口更加有咬劲。肉粽是枕头粽。肉粽个好坏取决于选料，姆妈个经验是选五花肉，连皮切块，勒加了黄酒个酱油里向浸一个钟头，糯米也要用浸肉剩下来个酱油拌透。但肉粽烧个辰光勿好忒长，否则精肉容易结块变硬。嘉兴肉粽是邪气有名气个，我太太从嘉兴师傅伊面偷到秘密：只摆一点点酱油，糯米里向拌上等个白酒，搅拌个辰光要用力擦，烧熟以后香气就更加足了。到屋里向一试，果然勿输拨嘉兴五芳斋！上海人欢喜吃个粽子有得豆沙、赤豆、红枣、栗子、豆瓣粽咾啥。我欢喜吃赤豆粽，香，而且赤豆夹勒雪白个米当中，有点洇散，效果好比是瓷器里个釉里红，老好看个。阿拉屋里个豆瓣粽也是一流个，新鲜个蚕豆拿皮剥脱，搭糯米拌匀，再摆一眼眼盐增加粘性，烧熟以后有得清香，蘸糖吃是别有风味呀。我个中学同学王文富，伊姆妈勒鲜肉粽里加只咸蛋黄，勒四十多年前头绝对是奢侈品噢，我吃了以后就涌起一种犯罪感。老上海吃肉粽要蘸绵白糖，滋味更加好，我试过个，确实勿错。

宁波人包碱水粽也是另有一功个，伊拉勿用粽箬，用晒干个毛笋壳。碱水粽大，一只就饱了。因为加仔碱，米个颜色有点变黄，类似北宋汝釉个天青色。高濂勒《遵生八笺》当中有条经验，凡是煠粽子，一定要用稻柴灰淋汁煠，也有用少量石灰煠个，目的就是要保持粽箬青绿个色泽搭特殊个清香。葛末，宁波人煠粽子辰光加几只碱水粽就有得异曲同工之妙了。碱水粽勒上海已经有段辰光勿露面了，近两年又浮出水面。我买过几趟，包得紧煠得透，香气再会浓。毛笋壳浪一点点个黑斑，看上去赛过时装模特儿身浪向个豹纹衫，邪气时尚。一只入口，果然是满满个宁波阿娘味道！

作者：沈嘉禄

朗读者：孙蕾

编辑：JoyWang